أحلام مراهقة !
الحياة فاكراها سهلة ..... جنة من ورد وسلام
فيها حرية وسعادة ..... والمرح من غير ملام
أجرى وقت مااعوز وأفرح *** واتبسط مش لازم أشرح
واكتئب أو حتى أجرح *** ممكن أسهر أو أنام
........................
على كيفى أختار صحابى ..... من ولاد أو من بنات
واحضر الفرح اللى أعوزه ..... واحضر أعياد الميلاد
واجرى أتفسح وأرجع *** وقت لما أحب أرجع
ولاأسمع كلمة توجع *** ولاتمسكلى الساعات
......................
بس عارفة ان ف بيوتنا ..... فيه عُقَد وفيه قُيُود
والنكد م الفقر راقد ..... يتفجر لو حتى عيد
واللى بنبات فيه بنصبح *** والحياة دى زى مسرح
دورى فيه أبكى ماأفرح *** طول ماقدامى سدود
..........................
قلبى يتعلق بواحد ..... لكن اتجوز بتانى
والعيال تيجى بهمومها ..... صبح ليل لازم أعانى
واشكى من ضهرى ورجلى *** والحياة عمالة تجرى
والتقينى شِبْت بدرى *** واقعد أضحك ع الأمانى
........................
ألقى شغل البيت عليا..... حَمْل ورضاعة وغسيل
زوج مابيساعد فى حاجة ..... بشكى من حِمْلِى التقيل !
وانزع النوم واصحى باكر *** يرجعوا ياكلوا واذاكر
وانسى أحلامى واعافِر *** وآجى أفوق ييجى الرحيل !
حسن رمضان ـ كبير باحثين بالوعظ بالأزهر الشريف
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.