عْلَاشْ؟؟؟
----------------------
عْلَاش دَنْيَتْنَا خْيَابَتْ
وْ عَمْرتْ ذْيابْ ؟؟
حْنَا نْحَرْثُو
وْهُمَا يَاكْلُو غَلَّتْنَا؟
--
عْلَاشْ السْفَاهَة
وَلَّاتْ تَمْشِي بْلَا ثْيَابْ؟؟
كُولْشِي تْعَرَّا
وْ بَانَتْ عَوْرَتْنَا ؟؟؟
--
عْلَاش الثِّقَة
تْفَقْدت بِينْ لَصْحًابْ؟؟
نْخُونُو الْعَهْد
وْ مَا نَبْقَاوْ فْ كَلْمَتْنَا؟
--
عْلَاشْ صِلَة الرَّحِمْ
تْقَطْعَتْ بِينْ لَحْبَابْ؟؟
وَ تْلَفْ الْمَسْرَبْ
بِينْ خَيمتْهُمْ وْ خَيْمَتْنَا
--
عْلَاشْ الصِّدقْ
مَنْ قْلُوبْنَا ذَابْ؟؟
نْكَذْبُو وْ مَا نَلْڭاوْ
بَاشْ نْغَطِّيوْ كَذْبَتْنَا؟؟
--
عْلَاشْ نْدِيرُوهَا بِيدِينَا
وَ نْقُولُو مَكْتَابْ؟؟
الْخَيْر مَنْ الله
و الشّرْ مَنْ فَعْلَتْنَا
--
فِينْ الرْجَالْ
اللّي كَانَت ْتْهَابْ؟؟
وَاشْ كُلْهُمْ مَاتُو
وَ مَاتَتْ هِيبتْنَا؟؟
--
فِينْ مْشَا لَحْيَا
ڭُولُو لِي فِينْ غَابْ؟؟
مَا بْقَيْنَا نَسْتَحْيَاوْ
مَا نْسَتْرُو زَلّتنَا؟؟
--
حَيْطْ الإسْلَام تَّهدَمْ
وْ بِيدِينَا رَابْ
ضَاعْ الدِّينْ
وَ تْلَفْ مَذْهَبْنَا
--
عْلَاشْ شَغْلُونَا
بْكَثْرَة الأحزابْ؟؟
وْ حَقْنَا ضَايَعْ
امْتَى يْفَرّج الله غُمَّتْنا
--
عْيِيتْ نْسَوَّلْ
مَا لْڭيْت جْوَابْ
يَا رَبِّي تْردْنَا لَصْوَابْ
وْ تَنْصُرْ امَّتْنَا
---------- فاطمة المسعودي -------------
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.